‘लिम्बुवान ,किरात ‘ नामाकरण गर्न २२ संगठन द्वारा ज्ञापन पत्र पेस

By federalnepal Last updated Feb 7, 2020

माघ २३ गते बिराटनगर , प्रदेश न .१ लाइ लिम्बुवान ,किरात नामाकरण गरिनु पर्दछ भनि २२ वटा संगठनहरुले प्रदेश न .१ का सभामुख र मुख्यमन्त्रीलाई ज्ञापन पत्र बुझाएका छन् |

लिम्बुवान, किरात संयुक्त संघर्ष समिति

ज्ञापन पत्र

मिति२०७६।१०।२३ गते

श्री माननिय सभामुख ज्यु ,

प्रदेश न .१ को संसद कार्यालय ,बिराटनगर

बिषय – ज्ञापन पत्र |

पहिचानमा आधारित प्रदेशहरुको निर्माण गर्न संविधानसभाको विषयगत समिति र राज्यपुनःसंरचना उच्चस्तरीय आयोगबाट सिफारिस भए बमोजिमका प्रदेशहरु सुनिश्चित हुनुपर्ने थियो तर सोको मर्मविपरित ७ प्रदेशको घोषणा गरियो । प्रदेशहरुको नामाकरण गर्ने सन्दर्भमा उत्पीडनकारी औपनिवेशिक एवम् सामन्ती केन्द्रीकृत एकात्मकवादी चिन्तनका धङ्धङीहरु झल्कने गरी पञ्चायती शैलीमा जबरजस्ती ढंगले गण्डकी, बागमती लगायत नामहरु राखिएको छ त्यस प्रति हामी खेद व्यक्त गर्दै विरोध गर्दछौँ । ऐतिहासिक पृष्ठभूमि एवम् पहिचानका आधारमा लिम्बुवान,किरात प्रदेश प्राप्तिका लागि हाम्रो आन्दोलन जारी रहेको कुरा अवगत गराउँदछौँ ।

वर्तमान प्रदेश नं. १ को भौगोलिक अवस्था, सामाजिक, सांस्कृतिक, ऐतिहासिक एवम् पहिचानको आधारमा लिम्बुवान, किरात स्वायत्त प्रदेश प्राप्तिका लागि उठेका राजनीतिक आन्दोलनहरु, विगतमा नेपाल सरकारसँग पटकपटक भएका सहमतिहरु र सातसालको क्रान्ति हुदै जनयुद्ध, जनआन्दोलन, मधेश आन्दोलन, आदिवासी जनजाति आन्दोलन, लिम्बुवान, किरात आन्दोलनले स्थापित गरेका मुद्दाहरुलाई मध्यनजर गर्दै अहिलेलाई संयुक्त पहिचानको आधारमा ‘लिम्बुवान, किरात’ नाम राख्नुपर्दछ भन्ने धारणा पुनः दोहोयाउँदछौँ । प्रदेश नं. १ को अधिवेशन शुरु हुन गइरहेको समय र सन्दर्भमा उपरोक्त धारणालाई पुनः दोहोयाउँदै सम्मानित प्रदेश सभा, माननीय प्रदेश सभा सदस्यहरु, प्रदेश सरकार र राजनीतिक दलहरुलाई माग सम्बोधनको लागि हामी हार्दिक अपील गर्दछौँ ।

कार्यक्रमहरु :-

१ ) ज्ञापनपत्र बुझाउने २ ) जिल्ला संयुक्त संघर्ष समितिहरु गठन गर्ने ३ ) जनमत सिर्जनाको लागि अन्तर्कृया गर्ने ४ )खबरदारी कोणसभा गर्ने ५ ) आवस्यकता अनुसार आन्दोलनको कार्यक्रम ससक्त गरि बढाउने